Tusass: Ilisarnaa­mmik kinaassuser­millu allannguineq siunertalik

Kalaallit Nunaat tupinnaannartumik isorartuvoq. Inuiaalli uatsinnit, savalimmiormiunit, amerlanerungaanngillat. Oqarsinnaavugullu naak uagut, Savalimmiormiut, Kalaallillu kultoorikkut assigiinngikkaluaqaluta sorpassuartigut assigiiffeqarpugut. Assigiiffittut taaneqarsinnaasut ilaat tassaavoq oqaatsivut immikkuullareqisut ullut tamaasa immikkut illersorniartariaqaratsigit.

Suleqatigiinnitsinni ilaatigut iluaqutigaarput Tele-Postip suliaqarfiinut tunngasunik suliallit allat siornatigut suleqatigisimagatsigit. Posta-p (Savalimmiuni allakkeriveqarfiup) ilisarnaamminik avammullu kinaassuserminik allannguinera ingerlannikuuarput, aammalu Kall-ip Vodafone-inngorluni ilisarnaamminik allannguinerani (nunatsinni teleselskabioriarluni nunani tamalaani ilisimaneqarluartunngorluni), kingusinnerusukkullu Føroya Tele-p suleqatigineranit – tamakku tamarmik niuerfimmi inuttoorsuunngitsumi ingerlanneqarput. Aammalu sullitarput alla kalaallit oqaasii atorlugit avammut nittarsaassinerani sullinnikuullutigu.

Ataatsimut isigalugu misilittakkat tulluartut, kulturikkut naleqqatigiilluni ataqqeqatigiinneq, ilusilersuinermillu soqutigisaqarluinnarneq Kalaallit Nunaanni suliffeqarfimmik allakkerinermik attaveqaatinillu sulialimmik suleqateqarnissatsinnut iluaqutigivagut.

Suliffeqarfiit kattunnerannit ilisarnaateqar­nermit ilisarnaammut ataatsimoor­fiusumut

Tamatta nalunngilagut. Suliffeqarfiit kattussimasut kattutaarpaluttumik ateqarlutillu kinaassuseqalersimasut. Soorlu taamani Føroya Banki naqinnerit nammineq atortakkani atorlugit Sjóvinnubankip ilisarnaataa assitaliummagu. Bankimit uuminnga immannguaq, issuminngalu immannguaq.

Taama periuseqarneq pisariitsutut oqaatigineqarsinnaavoq. Taamaasilluni suliaq ingerlaqqissinnaalersarpoq.

Piffissarli sivisunerusoq eqqarsaatigigaanni taamaaliornermi soorluuna pereersut iperarumaneqarneq ajortut. Suliffeqarfiusimasut taakku marluk. Uagut ilissilu. Kultoorit assigiinngitsut. Soorlu pisumi uani Telemiut Postimiullu.

Tele-Post tassunga killissimavoq. Alloriaqqinnissamut piffissanngorsimavoq. Uaguulerluta. Suliffeqarfik ataatsimoortoq, Kalaallit Nunaat tamakkerlugu attaveqatigiinnermik sullissisoq, ilisarnaat ataaseq.

Qeerlutooq pinniitsoq

Aallaqqaataaniilli nalunngilarput kalaallisut atserneqartussaasoq. Soorunami. Ateq suliatsinnik oqaluttuaannarnani kikkuunitsinnik oqaluttuartoq. Sivisuumik sukumiisumillu ujarlerpugut. Isumasiueqatigiinnerit, oqaatsit tungaasigut ilisimasaqarluartunit siunnersorneqarnerit, ordbogit, siunnersuuterpassuillu.

Siunnersuutitsialappassuillu piukkunnartut akornanni naggataatigut ajugaasuuvoq ateq Tusass. Taaguutip Tusass-ip oqaluttuassartaa soqutiginarpoq. Soqutiginartipparput ateq taanna Tele-Postip siornatigut kiffartuussinerminut aalajangersimasumut ateritissimammagu. Taletidskortip taaguutaa – ateq immaqa ataqqinarpallaanngitsoq. Kisianni ukiuni kingullerni taaguut Tusass eqeersarneqartutut ippoq, kiffartuussinerit arlallit tassunga attuumassuteqartinneqalerlutik, allaallu Tele-Postimit immikkoortutullusooq ilaannikkut misinnarsinnaasarluni.

Maannalu aalajangiunneqarpoq suliffeqarfik tamarmi Tusassimik ateqalissasoq. Tusass. Oqaaseq Kalaallit Nunaanni ulluinnarni inuulluaqqusigaangatta atortagarput.

Taamaasilluni Tusass taletidskortimut taaguutaannaajunnaarluni suliffeqarfimmut tamarmut taaguutaalerpoq.

Qanganisar­­palulaarpa? Aap. Mutiorpaluppa? Aamma aap.

Suliffeqarfissuup Tusassip suliarisartagaasa siammasissusaat nassuiaruminaalaarpoq. Apple Watchit nutaanerpaat tunisarivaat, aammali sinerissami raatiukkut attaveqaqatigiinnerit tamaasa ingerlataralugit. Amazonimiit allatsitatit tikisittarpaat, immakkullu kabelersuit aamma isumagisaralugit.

Taama suliaqarniaraanni tamatigoortuusariaqarpoq. Ilisarnaat inuussutissarsiornermut inuinnarnullu saaffiginnittoq. Oqarsinnaavugut qalipaasersuinerit assigiinngitsorujussuit marluk. Aappaa immaqa qanganisarpalunnerusoq. Ataavartitsisoq. Tungujortoq, qaqortoq, tungujortorlu qaamasoq. Aappaalu uummaarissupilussuaq. Inuppalaartoq, eqeersimaartoq, qalipaatigissoq. Kalaallit Nunaanni illorpassuartulli qalipaatigissaartigisoq.

Taamaasillutit ullormi ataatsimi internetimik pilersuisoq naaperiarlugu nunaqarfigisanni pisiniarfik qalipaatigissoq alakkarsinnaavat.

Attaveqarneq qitiutillugu

Ilisarnaatip Tusassip oqaluttuassartaa tassaavoq attaveqartitsineq. Tassami Kalaallit Nunaat nunarsuarmi avinngarusimasumiippoq. Kalaallit Nunaatali iluani aamma inuit imminnut avinngarusimasuni inissisimallutik. Tusassip suliassaa tassaniippoq: Kalaallit Nunaat nunarsuup sinneranut attaveqartissallugu, kalaallillu imminnut attaveqartissallugit.

Ungasissuseq siornatigut kilometerinut minutsinullu uuttorneqartarpoq, ullutsinnili millisekundinut toorsinernullu uuttorneqartarpoq.

Oqaluttuaq taanna atissap nutaap saqqummiunneqarnerani filmimi uani oqaluttuarineqarpoq.

Naleqqatigiinneq

Ataqqeqatigiinneq suleqatigiinnitsinni qitiutittuaannarparput. Kisianni Tusassip suleqatiginerani taanna immikkut ersarissartariaqarsimavarput. Kalaallit Nunaanni kulturi paasiniarsarissallugu assut pingaartipparput. Suut quianartutut isigineqartarnersut, qanorlu eqqarsartaateqarnersut. Oqaluttuarisaanikkullu pisuussusersuat.  Aammalu sumiiffiit avinngarusimasinnaanersuat.

Taamatut suleriaaseqarnerput assigiinngitsunik ilisarnaateqarpoq. Siullertut soorunami kalaallisut ateqalertussaanera. Aammalu kalaallit oqaasii Tusassip saqqummiuttagaani tamatigut siulliunneqarlutillu pingaartinneqarnerpaasussaasut.

Sumiiffiit avinngarusimasumiinneri peqqutaallutik aamma sumiiffimmut tulluarsakkanik aaqqiisariaqarsimavugut. Taamaasillutik Dekostovan-imi sulisuutitta Tele-Post centerini sinerissamiittuni sulisut allagartanik nivinngaassuinermik folieringimillu ilinniartissimavaat, Tusassip ilisarnaatai nutaat nivinngaassorsinnaa­niassammatigik.

Ataatsimut isigalugu suliassaq una peqataaffigisimagatsigu Sendistovanimi Dekostovanimilu assut nuannaarutigalugulu tulluusimaarutigaarput. Pilluaritsi!